1971eko irailean ireki zen gure ikastola sukalde gisako batean, lehen estaian, oraingo auto-eskolaren gaineko aldean. Kanpora joateko aire hartzera, andereñoak txikienak bat-banazka jaitsi behar zituen, besoetan!  

Sei hilabete geroago, Hôtel de la Nivelle-ko gela batera lekualdatu zen. Ondotik, 1973ko Bazko garaian, Moxkorenean kokatu zen ikastola 3 hilabeteko, prefabrikatua muntatu artean.  

Haste-hasterik, gela egoki bat eskuratzea izan zen gurasoen buru-hauste nagusia. Hazparnen zegoen prefabrikatu batez jabetzea erdietsi zuten. Horrela, lehenak izan ziren Ipar Euskal Herri honetan eskola gelaren jabe izan zirenak. Gurasoen asetasuna osoa izan zen, eraikin hori egiazko ikasgela baterako egina baitzen eta beste eskolen artean kokatua baitzen…

Hainbat lekualdaketen ondotik, 2006az geroztik, ikastola egungo eraikinetan kokatua da!